Jud Jud köp kalɨ kƚiñ rɨka
Jude
1Yad Jud, Jems nɨmam nɨpe u. Jisas Krais wög gɨ ñeb bɨ nɨpe ap mɨdpin.Manö kalɨ kƚiñ rɨkabin anɨbi, kalöp nɨbi bɨ Bapi God, kalöp udnabin a göm udöm mɨdmagö löp nɨbi bɨ gau, kalɨ kƚiñ rɨkabin. Jisas Krais nɨpe kalöp abad mɨdöp.
a 2God apil mɨhau kalöp mög nɨŋmil, ud aij gɨmil, mɨdmagö lɨmil, gɨlö araŋ.
Bɨ God Manö piral hagep gau
3Nɨbi bɨ nɨŋeb aij yad. Kalöp köp kalɨ kƚiñ rɨkem, Jisas Krais hanɨp ud kamɨŋ yua manö aij u rɨmnap hagnabin, a gem, gasɨ u nɨŋnö. Pen yad uri gasɨ nɨŋbin, kale kƚö yabɨƚ gɨmim, Jisas Krais manö aij hanɨp nɨbi bɨ nɨpe hag ña u, nɨŋ ud pɨdöŋ göl gɨ mɨdaimim, manö anɨbu uri nöp köp kalɨ kƚiñ rɨkem, kalöp yunabin, a gɨpin. 4Bɨ naij God nɨŋagal rɨmnap agamɨj apöm, kalöp aip magum gɨpal. God nɨpe nɨbi bɨ mög nɨŋöm, Ñɨ nɨpe hag yuö apöm, uma u me, nɨbi bɨ nan si nan naij geinaböl u, God nɨp hag nɨŋlö, nɨpe nan si nan naij gɨnaböl u nɨŋöm arö gɨnab. Pen bɨ naij anɨb gau, manö aij anɨbu ud ado göm hagpal, “Hon nan si nan naij haƚöwaƚö gɨno, God hanɨp pen nan ap gagnab,” a gɨpal. Anɨg gɨpal anɨbu, Bɨ Kub hon Jisas Krais nɨp arö göm, gɨ naij yabɨƚ gɨpal. Hadame dagol gau God Manö kalɨ kƚiñ rɨköm, nɨbi bɨ anɨg gɨnaböl gau ilön kub yabɨƚ udnaböl, a gɨla. b 5Hadame nöp ga u nɨŋbim u pen hauƚ gɨmim rö löp rö, kalöp kauyaŋ hagnɨg gabin. God nɨbi bɨ nɨpe Isrel kai, ram mɨnöŋ Ijip nɨbö ud asɨk daua, pen hainö nɨp gasɨ nɨŋagla gau kalɨp al pak lö umla. c6Ejol rɨmnap, ram mɨnöŋ aij kale mɨd aij gɨla gau arö gɨlö, God kalɨp sɨbön göp mɨgan u nagɨ lö, manö kub hagep ñɨn kub u abad mɨdpal. d
7Anɨb unbö rö, Sodom Gomara abe, daun rɨmnap ram mɨnöŋ yöp söl anɨb gau abe, kale nɨbi si bɨ si gɨ damöm, gɨ naij yabɨƚ geila. Nɨbi bɨ mab ke pör pör innab au amöm, ilön kub udnaböl u, nɨbi bɨ gau magöŋhalö nɨŋlaŋ, a göm, Sodom Gomara nɨbi bɨ gau kalɨp mab mɨɫaŋ kumi kabö laŋ nɨbö u yuö, apöm kalɨp in habɨk ara. e
8Bɨ naböŋ nɨŋöm manö piral hagpal, hagabin anɨb gau, kale u rö nöp hañ romaŋ kale ke gɨ naij göm, Bɨ Kub manö nɨpe hag juöm, ejol gau kalɨp manö naij hagöm, gɨpal. 9Pen Mosɨs umö, ejol kub yabɨƚ Maikel aip, Seden aip, Mosɨs wip he u udnɨg pen pen haglö u, Maikel Seden nɨp hag juaga. Nɨpe yɨharɨŋ haga, “God nɨpe ke nöp gasɨ ñɨnɨm!” a ga. f 10Maikel gasɨ nɨŋ aij göm anɨg haga u pen bɨ hagabin gau, nan nɨhön nɨŋagpal gau, manö naij naij nöp hagöm haƚöwaƚö hag jubal. Pen kale, gasɨ nɨŋ aij gagöm, kaj kain gɨpal rö gɨpal u me, God pen kalɨp ilön kub yabɨƚ ñɨnab. g
11Bɨ anɨb gau kalɨp mög nɨŋbin. Adam ñɨ nɨpe Ken gɨ naij ga rö gɨpal. Mumug mani nan gau nöp gasɨ nɨŋöm, bɨ ne Belam hadame nöp ga rö gɨpal. Anɨb u, kale bɨ ne Kora, God Manö rɨb juöm uma rö umnɨg gaböl. h
12Pen kale God nɨp mɨdmagö löl gɨ, añ mam pen pen mɨdmagö löl gɨ, nan jɨm ñöl ñɨŋnɨg apim, magum gɨpim ñɨn u, kale God nɨp gasɨ nɨŋöm wasö, yɨharɨŋ apöm nan uŋam ud ñeb gɨ ñɨŋlö, gac kale kalöp u rö nöp cɨg göp. Anɨb u, kumi apöm möŋ alagöm yɨharɨŋ pak gɨ dö gɨ aröp rö u mɨdpal. Mab ñɨŋeb magö pɨlagö iƚ halö ud julö hadö böŋ nöp mɨƚep ga rö mɨdpal. i 13Nan naij ke yabɨƚ gɨ damöm, ñɨg solwara pa jö ma jö göm, kɨñu habkob lɨ ap lugöp rö gɨpal. Nɨbi bɨ anɨb gau, God nɨpe gö, kale gapɨ ju sɨbön aŋ gau am ado gɨ auagep rö adö u arnaböl.
14Adam iƚ nɨpe rɨka u, rɨk damöm, Inok nɨp me kagoƚ jɨŋ u ▼ yag daula. Inok nɨpe hadame nöp God manö nɨpe hagöm, bɨ kalöp piral hagpal anɨb gau rö nɨŋöm haga, “Nɨŋim! Bɨ Kub ejol uɫ nɨpe ñɨn juöl iru yabɨƚ nöp damöm, k 15nɨbi bɨ magöŋhalö manö kub hagnab. Nɨp gasɨ nɨŋagöm, manö nɨpe hagöp rö gagöm, nan si nan naij adö ke ke göm, nɨp manö kƚö naij adö ke ke hagöm gɨpal rö, kalɨp ilön kub yabɨƚ ñɨnab,” a ga. 16Bɨ manö piral hagpal, kalɨp hagabin gau, kale pör hag har har göl gɨ, manö udöl gɨ, gɨ mɨdpal. Hanɨp ke aij gɨnab adö u gun, a göm, haƚöwaƚö gɨ naij gɨlö arab. Yad nöp bɨ kub mɨdpin, a göm, gasɨ u nɨŋöm, hagpal. Pen nɨbi bɨ rɨmnap hanɨp aij gɨnɨm adö u gɨlaŋ, a göm, kalɨp hib dap raneb manö piral nöp hag hag gɨlö aröp.
17Pen bɨ nɨŋeb aij yad gau. Bɨ Kub hon Jisas Krais bɨ manö nɨpe ud arep gau nöd hagla manö u gasɨ nɨŋöl gɨ mɨdaimim. 18Kalöp hagla, “Ñɨn hain u, nɨbi bɨ God nɨp gasɨ nɨŋagal gau, gasɨ naij kale ke nɨŋbal rö göl gɨ, kalöp hag hain gɨnaböl,” a gɨla. l 19Bɨ hagabin bɨ anɨb gau, God Ana kalɨp aip mɨdagöp. Gasɨ ke auöp rö nɨŋöm gɨpal u me, kalöp nɨbi bɨ ud asɨk ke ke lɨbal. 20Pen nɨbi bɨ nɨŋeb aij yad gau. Jisas Krais manö aij u nɨŋ udpim u, nɨŋ udep magö uɫ yabɨƚ anɨbu nɨŋ ud pɨdöŋ gɨmim, manö aij anɨbu yuö u pör nöp rɨmnap halö nɨŋ aij gɨmim, gɨ dammim, gɨpe arnɨm. Ana Uɫ u kalöp gasɨ ñö nɨŋöl gɨ, kƚö nɨpe ud nɨp sabe göl gɨ mɨdaimim. m 21Bɨ Kub hon Jisas Krais kalöp mög nɨŋöb u me, nɨpe kalöp dam ram mɨnöŋ kumi kabö adö laŋ au lö, pör pör nöp kamɨŋ mɨdeinabim. Pen am nɨpe aip pör pör mɨdaiun, a gɨmim, abad mɨdpim ñɨn i, God hanɨp mɨdmagö löl gɨ nöp mɨdöp, a gɨmim, gasɨ u nɨŋ mɨdaimim.
22Nɨbi bɨ gasɨ mɨhöp nɨŋöm, gasɨ iru nɨŋbal gau, kalɨp mög nɨŋmim, manö hain hagmim. 23Nɨbi bɨ rɨmnap mab mɨɫaŋ adö u aröl rö löp gau, kalɨp ud kamɨŋ yumim, kamɨŋ aröl. Nɨbi bɨ rɨmnap kalɨp u rö nöp mög nɨŋmim udmim, pen mɨdmagö kale ke auöp rö gɨpal rö, hane u rö nöp gɨ naij gun rö löp, a gɨmim, nɨŋ aij gɨmim mɨdaimim. Nan si nan naij kale gɨpal gau pɨñɨŋ gɨmim, asɨ masɨ gɨmim. Nan si nan naij gɨ mɨdlö waƚɨj kale abe gac göp a gɨmim, udagmim. n
Bɨ Kub hib dap raneb manö ap
24Mɨñi kalöp God ñɨmagö adö u labin.Nɨpe kalöp abad mɨdö nɨŋöl gɨ, ap lug pakagnabim.
Hainö kalöp udöm, nɨpe ke mailö aij ke halö mɨdöp au lö,
nɨbi bɨ asɨŋ mɨdagöp nɨpe mɨdmim, mɨñ mɨñ yabɨƚ gɨnabim. o
25God nɨpe añɨ. Nɨpe hanɨp ud kamɨŋ yuöp.
Bɨ Kub hon Jisas Krais hanɨp, a göm, umöm uraka u,
hadame dagol gau rɨköm, mɨd damöm,
uri, hainö, pör pör nöp nɨpe mɨdep nöp mɨdöm,
nɨpe Bɨ mailö aij halö, Bɨ aij unbö ke,
Bɨ kƚö naij yabɨƚ, Bɨ magöŋhalö abadep mɨdöp.
Anɨbu, hib nɨpe pör nöp hagno adö araŋ.
Anɨb unbö rö aij.
Copyright information for
KPW